Scriptur: Luis Beer, Rabius, impressari constructur
La Societad svizra dals impressaris constructurs s’engascha cun tutta energia per chattar soluziuns modernas per in contract collectiv naziunal da lavur sco era per la pensiun anticipada sin il bajetg a partir da 60 onns. Dapi ils 30 d’avust 2016 ha ella participà a 17 rundas da tractativas. Ils impressaris constructurs na pretendan en las tractativas actualas davart il nov contract collectiv da lavur betg dapli uras da lavur che oz, mabain in’organisaziun pli flexibla da las uras da lavur sur l’entir onn. I duai esser pussaivel da registrar 100 uras minus respectivamain 200 uras plus ad onn. Cun questa mesira vulan ils impressaris constructurs mantegnair las plazzas stablas sin ils plazzals svizzers, sbassar l’attractivitad d’engaschar persunal temporar e reducir l’engaschament d’interpresas secundaras.
Gist en las valladas muntagnardas da noss chantun porscha quai d’ina vart dapli pussaivladads da reagir sin ils mais d’enviern flaivels e da l’autra vart pon ils occupads giudair lur temp liber cun in pajament dal salari da 100%. La cumpensaziun cun temp liber correspunda a la pretensiun dals sindicats d’augmentar la protecziun da la sanadad ed il temp da famiglia. Sch’i n’è excepziunalmain betg pussaivel da cumpensar las uras vegnan quellas pajadas sco fin ussa cun in supplement da paja da 25%. Ni il temp da lavur total na vegn augmentà ni ston ils lavurers da construcziun prestar lavur gratuita. Jau sper ch’ils sindicats returnian suenter las acziuns da protesta nunnecessarias a la maisa da tractativas per manar là discussiuns constructivas.
